کمان توڑ دی اپنی زرہ اتار چکا

کمان توڑ دی اپنی زرہ اتار چکا

خوشی مناؤ مرے دشمنو میں ہار چکا

اداس بیٹھی ہیں صحرا نوردیاں میری

میں اپنے آپ کو ہر دشت میں پکار چکا

میں قرض دار ہوں لوگو مجھے ذلیل کرو

نہ قرض یار چکا اور نہ قرض دار چکا

بچا رکھا تھا جو اک تیر اس جہاں کے لئے

وہ ایک تیر میں سینے میں اپنے مار چکا

ہیں اور کام مجھے زندگی اجازت دے

میں تیری زلف پریشاں بہت سنوار چکا

کوئی حساب تھا تا عمر چک نہیں پایا

وہی حساب جو ہر روز بار بار چکا