kanar-e-ab tere pairahan badalne ka

kanār-e-āb tire pairahan badalne kā

mirī nigāh meñ manzar hai shaam Dhalne kā

ye kaisī aag hai mujh meñ ki ek muddat se

tamāsha dekh rahā huuñ maiñ apne jalne kā

sunā hai ghar pe mirā muntazir nahīñ koī

so ab ke baar maiñ hargiz nahīñ sambhalne kā

ḳhud apnī zaat pe markūz ho gayā huuñ maiñ

ki hausla hī nahīñ tere saath chalne kā

ab aa ga.e ho to phir umr bhar yahīñ Thahro

badan se koī bhī rasta nahīñ nikalne kā

'salīm' sham-e-vajūd aa ga.ī hai bujhne par

bas intizār karo mom ke pighalne kā

kanar-e-ab tere pairahan badalne ka

meri nigah mein manzar hai sham Dhalne ka

ye kaisi aag hai mujh mein ki ek muddat se

tamasha dekh raha hun main apne jalne ka

suna hai ghar pe mera muntazir nahin koi

so ab ke bar main hargiz nahin sambhalne ka

KHud apni zat pe markuz ho gaya hun main

ki hausla hi nahin tere sath chalne ka

ab aa gae ho to phir umr bhar yahin Thahro

badan se koi bhi rasta nahin nikalne ka

'salim' sham-e-wajud aa gai hai bujhne par

bas intizar karo mom ke pighalne ka