kar gae the mil ke wo wade bahut

kar ga.e the mil ke vo vā'de bahut

chashm-e-vā meñ juḌ ga.e naqshe bahut

tū-tū maiñ-maiñ tarz-e-darveshī nahīñ

varna un se the gile-shikve bahut

thiiñ hazāroñ bāteñ dil meñ an-kahī

kuchh na kah paayā go vo Thahre bahut

hai udāsī dard-e-dil afsurdagī

dil-lagī meñ yuuñ mile tohfe bahut

hai hujūm-e-yād-hā-e-sarḳhushī

bazm-e-dil meñ phir rahe chehre bahut

thā mirī qismat meñ dīd-e-yār kam

saarī duniyā meñ rahe charche bahut

muḳhtasar sī zindagī meñ dekh lī

kaise kaise ham-nashīñ badle bahut

naqsh-e-kun kī be-sabātī dekh kar

dil hī dil meñ aaj ham ro.e bahut

tishnagī me'rāj hai 'āhan' batā

āgahī kī raah meñ tarse bahut

kar gae the mil ke wo wa'de bahut

chashm-e-wa mein juD gae naqshe bahut

tu-tu main-main tarz-e-darweshi nahin

warna un se the gile-shikwe bahut

thin hazaron baaten dil mein an-kahi

kuchh na kah paya go wo Thahre bahut

hai udasi dard-e-dil afsurdagi

dil-lagi mein yun mile tohfe bahut

hai hujum-e-yaad-ha-e-sarKHushi

bazm-e-dil mein phir rahe chehre bahut

tha meri qismat mein did-e-yar kam

sari duniya mein rahe charche bahut

muKHtasar si zindagi mein dekh li

kaise kaise ham-nashin badle bahut

naqsh-e-kun ki be-sabaati dekh kar

dil hi dil mein aaj hum roe bahut

tishnagi me'raj hai 'ahan' bata

aagahi ki rah mein tarse bahut