کرو بھی بات نہ مجھ سے اداس لوگوں کی

کرو بھی بات نہ مجھ سے اداس لوگوں کی

مجھے ڈراتی ہے آنکھوں میں یاس لوگوں کی

کسی کے لہجے کی تلخی کسی کی سرد نظر

ہے جمع دل میں مرے یہ اساس لوگوں کی

چلا نہ خاروں پہ کچھ بس تو گل مسل ڈالے

نکل رہی ہے اب ایسے بھڑاس لوگوں کی

مرے جنازے کو بس چار لوگ کافی ہیں

کسی کو ہوگی ضرورت پچاس لوگوں کی

نظر ہٹی ہی نہیں اپنے عکس سے ان کی

عجیب بات ہے یہ خوش لباس لوگوں کی

نکل ہی آتا ہے ہو کر غروب پھر سورج

تبھی تو مر نہیں پاتی ہے آس لوگوں کی

سمجھ میں آ گئی دنیا بھی زندگی بھی حناؔ

نگاہ جب سے ملی غم شناس لوگوں کی