kashkol-e-jaan se sikka-e-nafrat nikal kar

kashkol-e-jāñ se sikka-e-nafrat nikāl kar

ai dost phir se aa ke marāsim bahāl kar

chāhā thā umr-bhar tujhe pal meñ bhulā diyā

tū ne hī to kahā thā ki koī kamāl kar

ye dard kā safar hai bahut duur jā.egā

umr-e-ravāñ abhī se na mujh ko niDhāl kar

duniyā ko kyā ḳhabar ki guzartī hai ham pe kyā

likhte haiñ sher apne lahū ko ubaal kar

is shahr kā to hai yahī dastūr-e-zindagī

bas ḳhāmushī se dekh na koī savāl kar

maanā ki shā.erī hai asāsa tirā 'amīn'

ghar kī zarūriyāt kā kuchh to ḳhayāl kar

kashkol-e-jaan se sikka-e-nafrat nikal kar

ai dost phir se aa ke marasim bahaal kar

chaha tha umr-bhar tujhe pal mein bhula diya

tu ne hi to kaha tha ki koi kamal kar

ye dard ka safar hai bahut dur jaega

umr-e-rawan abhi se na mujh ko niDhaal kar

duniya ko kya KHabar ki guzarti hai hum pe kya

likhte hain sher apne lahu ko ubaal kar

is shahr ka to hai yahi dastur-e-zindagi

bas KHamushi se dekh na koi sawal kar

mana ki shaeri hai asasa tera 'amin'

ghar ki zaruriyat ka kuchh to KHayal kar