کشکول جاں سے سکۂ نفرت نکال کر

کشکول جاں سے سکۂ نفرت نکال کر

اے دوست پھر سے آ کے مراسم بحال کر

چاہا تھا عمر بھر تجھے پل میں بھلا دیا

تو نے ہی تو کہا تھا کہ کوئی کمال کر

یہ درد کا سفر ہے بہت دور جائے گا

عمر رواں ابھی سے نہ مجھ کو نڈھال کر

دنیا کو کیا خبر کہ گزرتی ہے ہم پہ کیا

لکھتے ہیں شعر اپنے لہو کو ابال کر

اس شہر کا تو ہے یہی دستور زندگی

بس خامشی سے دیکھ نہ کوئی سوال کر

مانا کہ شاعری ہے اثاثہ ترا امینؔ

گھر کی ضروریات کا کچھ تو خیال کر