کترا کے گزرتا ہے تو دیکھا نہیں جاتا

کترا کے گزرتا ہے تو دیکھا نہیں جاتا

بستی میں غریبوں کی اجالا نہیں جاتا

دولت سے کہاں جڑتے ہیں ٹوٹے ہوئے رشتے

شیشے کو کبھی گوند سے جوڑا نہیں جاتا

اس جھوٹ کے بازار میں سچ ڈھونڈنے والے

سوکھے ہوئے کپڑے کو نچوڑا نہیں جاتا

پریوں کی حسیں بانہوں میں وہ جھول رہا ہے

سوتے ہوئے بچے کو جھنجھوڑا نہیں جاتا

یہ چاند ستارے بھی ہیں سورج بھی ہے روشن

پھیلا ہے جو دنیا میں اندھیرا نہیں جاتا

صحبت میں بروں کی وہ رہا کرتا ہے محورؔ

اس بات پہ بیٹے کو نکالا نہیں جاتا