کون اب دیکھے فلک تیرا قمر آج کی رات

کون اب دیکھے فلک تیرا قمر آج کی رات

ان کے رخ سے ہی نہیں ہٹتی نظر آج کی رات

آپ رہ رہ کے مری سمت نہ دیکھو ورنہ

سب کو ہو جائے گی الفت کی خبر آج کی رات

بد گماں ان کو کہیں کر نہ دیں احباب مرے

لگ رہا ہے مجھے اس بات کا ڈر آج کی رات

ان کی رسوائی کا ہوتا نہ اگر خوف مجھے

میں حد عشق سے بھی جاتا گزر آج کی رات

خون ہو جائے گا برسوں کے یقین دل کا

کر کے وعدہ نہ تو للہ مکر آج کی رات

سجدہ مقبول ہو یا ہو نہ غرض کیا اس سے

رکھ دیا یار کی دہلیز پہ سر آج کی رات

بعد مدت ملی تصدیقؔ ہمیں تنہائی

ماسوا پیار کوئی بات نہ کر آج کی رات