kaun kahta hai ki pi kar dur ho jate hain gham

kaun kahtā hai ki pī kar duur ho jaate haiñ ġham

aur yaad aatī haiñ bāteñ aur taḌpāte haiñ ġham

muskurā kar apnī ḳhuddārī kī rakh letā huuñ laaj

muskurāhaT ke hasīñ parde meñ chhup jaate haiñ ġham

ehtiyāt-o-zabt ban jaatā hai jis dil kā mizāj

aise dil kā chupke chupke kaam kar jaate haiñ ġham

yuuñ bhī aḳhlāqan unheñ dil meñ jagah detā huuñ maiñ

mujh ko apnā hī samajhte haiñ to mil jaate haiñ ġham

tishna-kāmān-e-mohabbat ke fasāne hī sunāo

is tarah ai hamdamo āñkhoñ se bah jaate haiñ ġham

huuñ to ġham-qismat magar paayā hai vo rangīñ mizāj

mujh se bā'z-auqāt katrā kar guzar jaate haiñ ġham

she'r kah letā huuñ un ke faiz se maiñ bhī 'ra.īs'

ḳhair se itnā karam mujh par bhī farmāte haiñ ġham

kaun kahta hai ki pi kar dur ho jate hain gham

aur yaad aati hain baaten aur taDpate hain gham

muskura kar apni KHuddari ki rakh leta hun laj

muskurahaT ke hasin parde mein chhup jate hain gham

ehtiyat-o-zabt ban jata hai jis dil ka mizaj

aise dil ka chupke chupke kaam kar jate hain gham

yun bhi aKHlaqan unhen dil mein jagah deta hun main

mujh ko apna hi samajhte hain to mil jate hain gham

tishna-kaaman-e-mohabbat ke fasane hi sunao

is tarah ai hamdamo aankhon se bah jate hain gham

hun to gham-qismat magar paya hai wo rangin mizaj

mujh se ba'z-auqat katra kar guzar jate hain gham

she'r kah leta hun un ke faiz se main bhi 'rais'

KHair se itna karam mujh par bhi farmate hain gham