kaun kahta hai mahw-e-KHwab hun main

kaun kahtā hai mahv-e-ḳhvāb huuñ maiñ

sach to vo hai ki inqalāb huuñ maiñ

zindagī kyā hai aur maut hai kyā

in savālāt kā javāb huuñ maiñ

ḳhauf khātī hai mujh se ḳhāmoshī

dasht meñ gūñjtā rabāb huuñ maiñ

shahr ke bheḌiyoñ se kyā Darnā

janglī sher sā shabāb huuñ maiñ

har varaq jis kā aag aur dhuāñ

dāstānoñ kī vo kitāb huuñ maiñ

tum añdhere meñ kyoñ chale aa.e

raushnī meñ bhī be-hisāb huuñ maiñ

mujh ko jugnū kā naam de ke na hañs

apnī duniyā kā āftāb huuñ maiñ

kaun kahta hai mahw-e-KHwab hun main

sach to wo hai ki inqalab hun main

zindagi kya hai aur maut hai kya

in sawalat ka jawab hun main

KHauf khati hai mujh se KHamoshi

dasht mein gunjta rabab hun main

shahr ke bheDiyon se kya Darna

jangli sher sa shabab hun main

har waraq jis ka aag aur dhuan

dastanon ki wo kitab hun main

tum andhere mein kyon chale aae

raushni mein bhi be-hisab hun main

mujh ko jugnu ka nam de ke na hans

apni duniya ka aaftab hun main