کون سے عالم میں لے آیا ہے مرا دل مجھے

کون سے عالم میں لے آیا ہے مرا دل مجھے

ڈھونڈھتی پھرتی ہے ہر جانب میری منزل مجھے

میں تو اک شیشہ تھا شہر سنگ میں کیوں آ گیا

زندہ رہنا ہو گیا ہے اب بہت مشکل مجھے

عزم محکم ہو تو بن جاتا ہے مقصد راہ بر

خود سہارا دے گی فکر دورئ منزل مجھے

ناخدا سے کیا غرض پروردۂ طوفاں ہوں میں

موج کے دامن میں آتا ہے نظر ساحل مجھے

جو مرے کل تک رہے تھے ہم خیال و ہم نگاہ

آج انہیں پہچاننا بھی ہے بہت مشکل مجھے

سننے والی بات تھی بہتر تھا سنتے آپ بھی

مشورہ کچھ دے رہا تھا آج میرا دل مجھے

اشک آنکھوں میں امنڈ آئے اندھیرا چھا گیا

کچھ نہ سوجھا جب نظر آئی مری منزل مجھے

زندگی کو بے حقیقت میں سمجھتا تھا کبھی

ہے مگر اب موت بھی اندیشۂ باطل مجھے

مجھ کو ان تازہ بہاروں سے ہے کیا حاصل بہارؔ

ہر گل خنداں نظر آتا ہے زخم دل مجھے