kaun wo baaten sunta hai jo fasl-e-junun ke bab mein hain

kaun vo bāteñ suntā hai jo fasl-e-junūñ ke baab meñ haiñ

kis kis ko bedār karūñ sab sūraj mere ḳhvāb meñ haiñ

biphre paanī kī maujeñ har ghar kī chhat pe raqsāñ haiñ

ḳhair manā.ūñ kis kis kī sab shahr mire sailāb meñ haiñ

chūnā-gach dīvāroñ meñ jhāñko to ḳharābe pāoge

merī tarah kitne hī yahāñ suqrāt mire ahbāb meñ haiñ

kis kuufī ne ḳhat ke pahre lagā.e haiñ paḌhtī āñkhoñ par

kitne hī mafhūm abhī tak lafzoñ ke girdāb meñ haiñ

jin sadmoñ se guzre haiñ ye kab ke TuuT ga.e hote

yuuñ lagtā hai jaise koī faulād mire a.asāb meñ haiñ

patthar-des meñ kis ko sunā.e jā ke koī fariyād apnī

jaane kitne hashr bapā 'fāriġh' ke dil-e-betāb meñ haiñ

kaun wo baaten sunta hai jo fasl-e-junun ke bab mein hain

kis kis ko bedar karun sab suraj mere KHwab mein hain

biphre pani ki maujen har ghar ki chhat pe raqsan hain

KHair manaun kis kis ki sab shahr mere sailab mein hain

chuna-gach diwaron mein jhanko to KHarabe paoge

meri tarah kitne hi yahan suqraat mere ahbab mein hain

kis kufi ne KHat ke pahre lagae hain paDhti aankhon par

kitne hi mafhum abhi tak lafzon ke girdab mein hain

jin sadmon se guzre hain ye kab ke TuT gae hote

yun lagta hai jaise koi faulad mere aasab mein hain

patthar-des mein kis ko sunae ja ke koi fariyaad apni

jaane kitne hashr bapa 'farigh' ke dil-e-betab mein hain