KHak ke zaKHm ko pani se rafu karte hain

ḳhaak ke zaḳhm ko paanī se rafū karte haiñ

dekh ham kitnī ravānī se rafū karte haiñ

kabhī karte haiñ rafū ḳhuun kī ik dhaar se ham

aur kabhī ashk-fishānī se rafū karte haiñ

kasrat-e-ḳhvāb se phaT jaatī haiñ aksar āñkheñ

ham in āñkhoñ ko kahānī se rafū karte haiñ

der tak ek jagah rahne se aa jaate haiñ zaḳhm

to unheñ naql-e-makānī se rafū karte haiñ

ham vo bad-baḳht muhājir haiñ ki hijrat ke shigāf

mustaqil hijrat-e-sānī se rafū karte haiñ

sang-e-ehsās idhar aa ki rulā kar tujh ko

tirā patthar tire paanī se rafū karte haiñ

KHak ke zaKHm ko pani se rafu karte hain

dekh hum kitni rawani se rafu karte hain

kabhi karte hain rafu KHun ki ek dhaar se hum

aur kabhi ashk-fishani se rafu karte hain

kasrat-e-KHwab se phaT jati hain aksar aankhen

hum in aankhon ko kahani se rafu karte hain

der tak ek jagah rahne se aa jate hain zaKHm

to unhen naql-e-makani se rafu karte hain

hum wo bad-baKHt muhajir hain ki hijrat ke shigaf

mustaqil hijrat-e-sani se rafu karte hain

sang-e-ehsas idhar aa ki rula kar tujh ko

tera patthar tere pani se rafu karte hain