Khaar hai Khaar na gul hai gul-e-tar ki surat

ḳhaar hai ḳhaar na gul hai gul-e-tar kī sūrat

andalībān-e-chaman kyā hai ye ghar kī sūrat

nuur ke sāmne jaltā nahīñ zulmat kā charāġh

‘arsa-e-shab meñ tum aao to sahar kī sūrat

faiz kyā ham se uThā.egā musāfir koī

ham na dīvār kī sūrat na shajar kī sūrat

bāryāb-e-nigah-e-nāz koī hotā hai

ashk sab hote nahīñ lā'l-o-guhar kī sūrat

hosh dāman kā unheñ hai na garebāñ kā ḳhayāl

kyā se kyā ho ga.ī arbāb-e-nazar kī sūrat

rāste band har ik moḌ pe rahzan hī sahī

hausla ho to nikaltī hai safar kī sūrat

kal mire naqsh the is bazm-e-jahāñ kī zīnat

aaj paḌhte haiñ mujhe log ḳhabar kī sūrat

muztarib kyoñ haiñ añdheroñ ke parastār 'azīz'

kyā nazar aa ga.ī qindīl-e-sahar kī sūrat

KHar hai KHar na gul hai gul-e-tar ki surat

andaliban-e-chaman kya hai ye ghar ki surat

nur ke samne jalta nahin zulmat ka charagh

‘arsa-e-shab mein tum aao to sahar ki surat

faiz kya hum se uThaega musafir koi

hum na diwar ki surat na shajar ki surat

baryab-e-nigah-e-naz koi hota hai

ashk sab hote nahin la'l-o-guhar ki surat

hosh daman ka unhen hai na gareban ka KHayal

kya se kya ho gai arbab-e-nazar ki surat

raste band har ek moD pe rahzan hi sahi

hausla ho to nikalti hai safar ki surat

kal mere naqsh the is bazm-e-jahan ki zinat

aaj paDhte hain mujhe log KHabar ki surat

muztarib kyon hain andheron ke parastar 'aziz'

kya nazar aa gai qindil-e-sahar ki surat