KHabar ye kar de koi bewafa zamane ko

ḳhabar ye kar de koī bevafā zamāne ko

ki aaj jī mirā chāhā hai muskurāne ko

ḳhayāl-e-yār se kyā kyā umiid bāñdhī thī

ḳhayāl-e-yār bhī aayā to dil dukhāne ko

ḳhabar kahāñ thī kise inqalāb kahte haiñ

tirī nigāh ne samjhā diyā zamāne ko

sar-e-niyāz kī 'azmat kā kuchh ḳhayāl rahe

buland aur karo apne āstāne ko

qabā-darīda koī aur koī garebāñ-chāk

kahā thā kis ne shagūfoñ se muskurāne ko

'sirāj' maiñ bhī 'ajab huuñ 'ajīb qismat hai

ki jo bhī aayā vo aayā mujhe jalāne ko

KHabar ye kar de koi bewafa zamane ko

ki aaj ji mera chaha hai muskurane ko

KHayal-e-yar se kya kya umid bandhi thi

KHayal-e-yar bhi aaya to dil dukhane ko

KHabar kahan thi kise inqalab kahte hain

teri nigah ne samjha diya zamane ko

sar-e-niyaz ki 'azmat ka kuchh KHayal rahe

buland aur karo apne aastane ko

qaba-darida koi aur koi gareban-chaak

kaha tha kis ne shagufon se muskurane ko

'siraj' main bhi 'ajab hun 'ajib qismat hai

ki jo bhi aaya wo aaya mujhe jalane ko