خبر یہ کر دے کوئی بے وفا زمانے کو

خبر یہ کر دے کوئی بے وفا زمانے کو

کہ آج جی مرا چاہا ہے مسکرانے کو

خیال یار سے کیا کیا امید باندھی تھی

خیال یار بھی آیا تو دل دکھانے کو

خبر کہاں تھی کسے انقلاب کہتے ہیں

تری نگاہ نے سمجھا دیا زمانے کو

سر نیاز کی عظمت کا کچھ خیال رہے

بلند اور کرو اپنے آستانے کو

قبا دریدہ کوئی اور کوئی گریباں چاک

کہا تھا کس نے شگوفوں سے مسکرانے کو

سراجؔ میں بھی عجب ہوں عجیب قسمت ہے

کہ جو بھی آیا وہ آیا مجھے جلانے کو