خفی لفظوں سے لکھی درد کی تحریر ہوتی ہے

خفی لفظوں سے لکھی درد کی تحریر ہوتی ہے

یہ عورت ہر طرح سے مرد کی جاگیر ہوتی ہے

وہ جس کی آنکھ میں محرومیاں بستی ہیں صدیوں سے

وہ خود کتنے ہی رشتوں کی مگر زنجیر ہوتی ہے

جکڑ رکھا ہے جس کے دل کو ان دیکھے عذابوں نے

وہ ہر اک خواب کی کیسی حسیں تعبیر ہوتی ہے

جنون عشق کی سرحد پہ جاں سے جو گزر جائے

وہی سسی وہی سوہنی وہی تو ہیر ہوتی ہے

نکل کر خلد سے بھی تو زمیں کوئی نہیں اس کی

زمیں زادی کی بھی دیکھو عجب تقدیر ہوتی ہے

نہ ہو جب چاند آنچل میں نہ سورج دل کی بستی کا

تن مردہ سنبھالے وہ بڑی دلگیر ہوتی ہے

جو دن بھر جنگ لڑتی ہے مصائب اور مسائل سے

شفقؔ پھر شام کو ہے رنگ سی تصویر ہوتی ہے