KHarab hun ki junun ka chalan hi aisa tha

ḳharāb huuñ ki junūñ kā chalan hī aisā thā

ki terā husn mirā husn-e-zan hī aisā thā

har ek Duub gayā apnī apnī yādoñ meñ

ki terā zikr sar-e-anjuman hī aisā thā

bahāna chāhiye thā jū-e-shīr-o-shīrīñ kā

koī samajh na sakā tesha-zan hī aisā thā

had-e-adab se gurezāñ na ho sakā koī

ki sādgī meñ tirā bāñkpan hī aisā thā

rafāqatoñ meñ bhī niklīñ riqābateñ kyā kyā

maiñ kyā kahūñ tirā rū-e-suḳhan hī aisā thā

jahāñ bhī chhāñv milī do-ghaḌī ko baiTh rahe

dayār-e-ġhair kahāñ thā vatan hī aisā thā

thī daaġh daaġh mire qātiloñ kī ḳhush-poshī

ki umr-bhar mire sar par kafan hī aisā thā

mujhe to yuuñ lagā tarshā huā thā sho.ala koī

badan hī aisā thā kuchh pairahan hī aisā thā

haqīqatoñ meñ bhī thī 'shāz' rañg-āmezī

qasīda-e-lab-o-āriz kā fan hī aisā thā

KHarab hun ki junun ka chalan hi aisa tha

ki tera husn mera husn-e-zan hi aisa tha

har ek Dub gaya apni apni yaadon mein

ki tera zikr sar-e-anjuman hi aisa tha

bahana chahiye tha ju-e-shir-o-shirin ka

koi samajh na saka tesha-zan hi aisa tha

had-e-adab se gurezan na ho saka koi

ki sadgi mein tera bankpan hi aisa tha

rafaqaton mein bhi niklin riqabaten kya kya

main kya kahun tera ru-e-suKHan hi aisa tha

jahan bhi chhanw mili do-ghaDi ko baiTh rahe

dayar-e-ghair kahan tha watan hi aisa tha

thi dagh dagh mere qatilon ki KHush-poshi

ki umr-bhar mere sar par kafan hi aisa tha

mujhe to yun laga tarsha hua tha shoala koi

badan hi aisa tha kuchh pairahan hi aisa tha

haqiqaton mein bhi thi 'shaz' rang-amezi

qasida-e-lab-o-ariz ka fan hi aisa tha