KHaraba ek din ban jae ghar aisa nahin hoga

ḳharāba ek din ban jaa.e ghar aisā nahīñ hogā

achānak jī uTheñ vo bām-o-dar aisā nahīñ hogā

vo sab ik bujhne vaale shola-e-jāñ kā tamāshā thā

dobāra ho vahī raqs-e-sharar aisā nahīñ hogā

vo saarī bastiyāñ vo saare chehre ḳhaak se nikleñ

ye duniyā phir se ho zer-o-zabar aisā nahīñ hogā

mire gum-gashtagāñ ko le ga.ī mauj-e-ravāñ koī

mujhe mil jaa.e phir ganj-e-guhar aisā nahīñ hogā

ḳharāboñ meñ ab un kī justujū kā silsila kyā hai

mire gardūñ-shikār aa.eñ idhar aisā nahīñ hogā

hayūle raat bhar mehrāb-o-dar meñ phirte rahte haiñ

meñ samjhā thā ki apne ghar meñ Dar aisā nahīñ hogā

maiñ thak jā.ūñ to bāzū-e-havā mujh ko sahārā de

girūñ to thaam le shāḳh-e-shajar aisā nahīñ hogā

koī harf-e-duā mere liye patvār ban jaa.e

bachā le Dūbne se chashm-e-tar aisā nahīñ hogā

koī āzār pahle bhī rahā hogā mire dil ko

rahā hogā magar ai chāra-gar aisā nahīñ hogā

ba-hadd-e-vus.at-e-zanjīr gardish kartā rahtā huuñ

koī vahshī giraftār-e-safar aisā nahīñ hogā

badaun terī miTTī se bichhaḌ kar jī rahā huuñ maiñ

nahīñ ai jān-e-man, bār-e-digar aisā nahīñ hogā

KHaraba ek din ban jae ghar aisa nahin hoga

achanak ji uThen wo baam-o-dar aisa nahin hoga

wo sab ek bujhne wale shola-e-jaan ka tamasha tha

dobara ho wahi raqs-e-sharar aisa nahin hoga

wo sari bastiyan wo sare chehre KHak se niklen

ye duniya phir se ho zer-o-zabar aisa nahin hoga

mere gum-gashtagan ko le gai mauj-e-rawan koi

mujhe mil jae phir ganj-e-guhar aisa nahin hoga

KHarabon mein ab un ki justuju ka silsila kya hai

mere gardun-shikar aaen idhar aisa nahin hoga

hayule raat bhar mehrab-o-dar mein phirte rahte hain

mein samjha tha ki apne ghar mein Dar aisa nahin hoga

main thak jaun to bazu-e-hawa mujh ko sahaara de

girun to tham le shaKH-e-shajar aisa nahin hoga

koi harf-e-dua mere liye patwar ban jae

bacha le Dubne se chashm-e-tar aisa nahin hoga

koi aazar pahle bhi raha hoga mere dil ko

raha hoga magar ai chaara-gar aisa nahin hoga

ba-hadd-e-wusat-e-zanjir gardish karta rahta hun

koi wahshi giraftar-e-safar aisa nahin hoga

badaun teri miTTi se bichhaD kar ji raha hun main

nahin ai jaan-e-man, bar-e-digar aisa nahin hoga