خوف تعمیر کی بنیاد میں رکھا ہوا ہے

خوف تعمیر کی بنیاد میں رکھا ہوا ہے

حادثہ صورت ایجاد میں رکھا ہوا ہے

ایک امکان چھپا تھا کسی لہجے میں وہاں

اک تحیر یہاں روداد میں رکھا ہوا ہے

کیسے مژگان حیا توڑ کے باہر نکلے

گریہ اک ضبط کی میعاد میں رکھا ہوا ہے

سانس لیتے ہی بھڑکتا ہے مرے سینے میں

اک دیا سا جو تری یاد میں رکھا ہوا ہے

خس و خاشاک ہوئے خم تو کھلی خوشبوئے زلف

لطف یعنی کسی افتاد میں رکھا ہوا ہے

ان ستاروں سے بھلا کون سنے چنگ و رباب

زخمۂ بخت زمیں زاد میں رکھا ہوا ہے