KHayal-e-tark-e-talluq ko Talte rahiye

ḳhayāl-e-tark-e-ta.alluq ko Tālte rahiye

havā meñ koī hayūlā uchhālte rahiye

purāne āshnā chehroñ ko yaad kar kar ke

hujūm-e-ġham meñ bhī dil ko sambhālte rahiye

tamām umr yūñhī kiije hasratoñ kā shumār

tamām umr yūñhī dukh sambhālte rahiye

sajā ke roz na.ī mahfileñ na.e chehre

zar-e-fasurda-dilī ko ujālte rahiye

raheñ na dasht jo sahrā-navardiyoñ ke liye

to apne sahn meñ patthar uchhālte rahiye

na mil sakeñ jo vo yārān-e-gul-sifat 'nāhīd'

to apne aap ko sāñchoñ meñ Dhālte rahiye

KHayal-e-tark-e-talluq ko Talte rahiye

hawa mein koi hayula uchhaalte rahiye

purane aashna chehron ko yaad kar kar ke

hujum-e-gham mein bhi dil ko sambhaalte rahiye

tamam umr yunhi kije hasraton ka shumar

tamam umr yunhi dukh sambhaalte rahiye

saja ke roz nai mahfilen nae chehre

zar-e-fasurda-dili ko ujalte rahiye

rahen na dasht jo sahra-nawardiyon ke liye

to apne sahn mein patthar uchhaalte rahiye

na mil saken jo wo yaran-e-gul-sifat 'nahid'

to apne aap ko sanchon mein Dhaalte rahiye