خیال یار جب آتا ہے بیتابانہ آتا ہے

خیال یار جب آتا ہے بیتابانہ آتا ہے

کہ جیسے شمع کی جانب کوئی پروانہ آتا ہے

تصور اس طرح آتا ہے تیرا محفل دل میں

مرے ہاتھوں میں جیسے خود بہ خود پیمانہ آتا ہے

خرد والو خبر بھی ہے کبھی ایسا بھی ہوتا ہے

جنوں کی جستجو میں آپ ہی ویرانہ آتا ہے

کبھی قصد حرم کو جب قدم اپنا اٹھاتا ہوں

مرے ہر اک قدم پر اک نیا بت خانہ آتا ہے

در جاناں سے آتا ہوں تو لوگ آپس میں کہتے ہیں

فقیر آتا ہے اور با شوکت شاہانہ آتا ہے

دکن کی ہیر سے آزادؔ کوئی جا کے یہ کہہ دے

کہ رانجھے کے وطن سے آج اک دیوانہ آتا ہے

وہی ذکر دکن ہے اور وہی فرقت کی باتیں ہیں

تجھے آزادؔ کوئی اور بھی افسانہ آتا ہے