KHayal guzre kahan kahan ka irada un ko ho gar yahin ka

ḳhayāl guzre kahāñ kahāñ kā irāda un ko ho gar yahīñ kā

na kuchh Thikānā mire gumāñ kā na kuchh Thikānā mire yaqīñ kā

na shauq mujh ko hai hūr-e-īñ kā na pās-e-vā.iz hai apne diiñ kā

jo zikr karnā hai gar yahīñ kā sunā na jhagḌā kahīñ kahīñ kā

ḳharāb kū-e-butāñ hai ḳhilqat yahīñ se paate haiñ ranj-o-rāhat

sip.har-e-gardish meñ kar na jur.at ki daur aayā hai ab zamīñ kā

shahīd hone kī ye tamannā na dil se niklegī dekh lenā

uThā.e ḳhanjar vo haath meñ kyā na yaar sambhle jab āstīñ kā

hazār naale zabāñ pe laatā hazār mahshar abhī dikhātā

shab-e-judā.ī agar na aatā ḳhayāl us chashm-e-surmagīñ kā

nishān-e-pā-e-adū ne maarā ki tere dar par nahīñ gavārā

jhuke jo sajde ko sar hamārā miTā.eñ likkhā huā jabīñ kā

kahūñ matālib sab apne jī ke ye shart kiije ki haañ na kiije

kaho nahīñ phir usī tarah se mujhe hai sunñā nahīñ nahīñ kā

jo pūchhe mujh sā hai koī bad-zan kaho na ahvāl-e-vasl-e-dushman

ye maiñ ne maanā ki tum ho pur-fan 'ilāj kyā chashm-e-sharmgīñ kā

milegī mahshar meñ daad ab kyā adā-e-matlab meñ huuñ maiñ uljhā

bayān pahle hī kyuuñ kiyā thā tumhāre gesū-e-ambarīñ kā

bayān-e-lutf-e-adū jafā hai ye tum se sau-bār kah diyā hai

phir ab kī sun lo nahīñ rahā hai hameñ bhī zabt āh-e-ātshīñ kā

'ajab hai 'sālik' bhī riñd-mashrab ki chhoḌ baiThā hai millateñ sab

na māntā hai kisī kā maz.hab na hai ye pāband apne diiñ kā

KHayal guzre kahan kahan ka irada un ko ho gar yahin ka

na kuchh Thikana mere guman ka na kuchh Thikana mere yaqin ka

na shauq mujh ko hai hur-e-in ka na pas-e-waiz hai apne din ka

jo zikr karna hai gar yahin ka suna na jhagDa kahin kahin ka

KHarab ku-e-butan hai KHilqat yahin se pate hain ranj-o-rahat

siphar-e-gardish mein kar na jurat ki daur aaya hai ab zamin ka

shahid hone ki ye tamanna na dil se niklegi dekh lena

uThae KHanjar wo hath mein kya na yar sambhle jab aastin ka

hazar nale zaban pe lata hazar mahshar abhi dikhata

shab-e-judai agar na aata KHayal us chashm-e-surmagin ka

nishan-e-pa-e-adu ne mara ki tere dar par nahin gawara

jhuke jo sajde ko sar hamara miTaen likkha hua jabin ka

kahun matalib sab apne ji ke ye shart kije ki han na kije

kaho nahin phir usi tarah se mujhe hai sunna nahin nahin ka

jo puchhe mujh sa hai koi bad-zan kaho na ahwal-e-wasl-e-dushman

ye main ne mana ki tum ho pur-fan 'ilaj kya chashm-e-sharmgin ka

milegi mahshar mein dad ab kya ada-e-matlab mein hun main uljha

bayan pahle hi kyun kiya tha tumhaare gesu-e-ambarin ka

bayan-e-lutf-e-adu jafa hai ye tum se sau-bar kah diya hai

phir ab ki sun lo nahin raha hai hamein bhi zabt aah-e-atshin ka

'ajab hai 'salik' bhi rind-mashrab ki chhoD baiTha hai millaten sab

na manta hai kisi ka mazhab na hai ye paband apne din ka