KHayal mein hai jo chehra nazar bhi aaega

ḳhayāl meñ hai jo chehra nazar bhī aa.egā

vo apne ghar se kabhī mere ghar bhī aa.egā

bichhaḌte vaqt kā manzar bhī dhyān meñ rakhnā

safar meñ kaam ye raḳht-e-safar bhī aa.egā

nikal to aa.e haiñ zindān-e-tīrgī se magar

ye sochte haiñ hameñ kuchh nazar bhī aa.egā

sabhī na ghar ke darīchoñ se bach ke guzreñge

havā kā koī to jhoñkā idhar bhī aa.egā

malāl sāya-e-dīvār-o-dar abhī se kyā

ye marhala to sar-e-rahguzar bhī aa.egā

mirī navā to kabhī rā.egāñ nahīñ jaatī

agar vo ghar meñ huā baam par bhī aa.egā

kise gumān thā 'ḳhāvar' vahāñ kī miTTī meñ

yahāñ kī āb-o-havā kā asar bhī aa.egā

KHayal mein hai jo chehra nazar bhi aaega

wo apne ghar se kabhi mere ghar bhi aaega

bichhaDte waqt ka manzar bhi dhyan mein rakhna

safar mein kaam ye raKHt-e-safar bhi aaega

nikal to aae hain zindan-e-tirgi se magar

ye sochte hain hamein kuchh nazar bhi aaega

sabhi na ghar ke darichon se bach ke guzrenge

hawa ka koi to jhonka idhar bhi aaega

malal saya-e-diwar-o-dar abhi se kya

ye marhala to sar-e-rahguzar bhi aaega

meri nawa to kabhi raegan nahin jati

agar wo ghar mein hua baam par bhi aaega

kise guman tha 'KHawar' wahan ki miTTi mein

yahan ki aab-o-hawa ka asar bhi aaega