KHayal-o-KHwab ko bagh-o-bahaar kar diya hai

ḳhayāl-o-ḳhvāb ko bāġh-o-bahār kar diyā hai

tirī talab ne mujhe ḳhush-gavār kar diyā hai

hameñ ḳhavās ke zumre meñ Dālnā thā magar

hameñ 'avām kī mad meñ shumār kar diyā hai

kuchh iztirāb sā hotā hai ab bhī aahaT par

agarche tark tirā intizār kar diyā hai

kisī bhī amr pe qudrat 'atā na kī mujh ko

mire sipurd magar kārobār kar diyā hai

azal abad meñ zarūrī thā vaqfa-e-mābain

magar tavīl bahut iḳhtisār kar diyā hai

numūd-e-sub.h ne sho'la banā diyā sūraj

zuhūr-e-shab ne sitāra-sharār kar diyā hai

jise maiñ dil se gale se lagā ke rakhtā huuñ

use jahāz pe 'āsim' savār kar diyā hai

KHayal-o-KHwab ko bagh-o-bahaar kar diya hai

teri talab ne mujhe KHush-gawar kar diya hai

hamein KHawas ke zumre mein Dalna tha magar

hamein 'awam ki mad mein shumar kar diya hai

kuchh iztirab sa hota hai ab bhi aahaT par

agarche tark tera intizar kar diya hai

kisi bhi amr pe qudrat 'ata na ki mujh ko

mere sipurd magar karobar kar diya hai

azal abad mein zaruri tha waqfa-e-mabain

magar tawil bahut iKHtisar kar diya hai

numud-e-subh ne sho'la bana diya suraj

zuhur-e-shab ne sitara-sharar kar diya hai

jise main dil se gale se laga ke rakhta hun

use jahaz pe 'asim' sawar kar diya hai