خیال و خواب کو باغ و بہار کر دیا ہے

خیال و خواب کو باغ و بہار کر دیا ہے

تری طلب نے مجھے خوشگوار کر دیا ہے

ہمیں خواص کے زمرے میں ڈالنا تھا مگر

ہمیں عوام کی مد میں شمار کر دیا ہے

کچھ اضطراب سا ہوتا ہے اب بھی آہٹ پر

اگرچہ ترک ترا انتظار کر دیا ہے

کسی بھی امر پہ قدرت عطا نہ کی مجھ کو

مرے سپرد مگر کاروبار کر دیا ہے

ازل ابد میں ضروری تھا وقفۂ مابین

مگر طویل بہت اختصار کر دیا ہے

نمود صبح نے شعلہ بنا دیا سورج

ظہور شب نے ستارا شرار کر دیا ہے

جسے میں دل سے گلے سے لگا کے رکھتا ہوں

اسے جہاز پہ عاصمؔ سوار کر دیا ہے