خیالی شکل پر تیرا گماں ہوتا تو کیا ہوتا

خیالی شکل پر تیرا گماں ہوتا تو کیا ہوتا

تصور محو سیر لا مکاں ہوتا تو کیا ہوتا

پسے جاتے ہیں دل رفتار سے آج ایک عالم کے

جو اے پیر فلک تو نوجواں ہوتا تو کیا ہوتا

تمہاری دوستی وجہ سکون قلب مضطر تھی

اگر دشمن ہمارا آسماں ہوتا تو کیا ہوتا

خطا کیا کی زباں پر مدعائے دل اگر لایا

خموشی سے جو اظہار بیاں ہوتا تو کیا ہوتا

وہ میرا درد دل سن سن کے مجھ پر مسکراتے ہیں

خدا ناکردہ گر میں بے زباں ہوتا تو کیا ہوتا

یہ مانا دوستی کو مر کے ثابت کر دیا ہم نے

کسی کو غم نصیب دشمناں ہوتا تو کیا ہوتا

شکستہ کر چکی تھی دل کو آفت نا مرادی کی

کوئی ٹوٹے مکاں میں میہماں ہوتا تو کیا ہوتا

نہ کھلتا حشر تک جو فرق ہے ادنیٰ و اعلیٰ میں

نہ دور اتنا زمیں سے آسماں ہوتا تو کیا ہوتا

گلستاں میں تڑپ کر کل گری ہے جس جگہ بجلی

وہیں یا رب ہمارا آشیاں ہوتا تو کیا ہوتا

بچایا شرک سے مسعودؔ شان بے نیازی نے

اگر وحدت پہ کثرت کا گماں ہوتا کیا ہوتا