khiDki kholo kuchh to yahan bhi taza narm hawa aae

khiḌkī kholo kuchh to yahāñ bhī taaza narm havā aa.e

manzar sahn-e-chaman kā ubhre bū-e-dard-rubā aa.e

be-jāñ fan meñ jaan sī aa.e zaḳhm-e-tamannā taaza ho

yaad meñ rañg hinā kā lahke raqs meñ bād-e-sabā aa.e

māh-gazīda raat hai sākit jaise koī ā.īna

os ke sabze par girne kī sannāTe meñ sadā aa.e

fazl-e-ḳhizāñ ke sūkhe patte haañp rahe haiñ saa.e meñ

saaya apne tah-ḳhānoñ meñ jaa.e unheñ pahuñchā aa.e

pahroñ dil se bāteñ kar ke chain se baiThe haiñ aise

jaise jo kuchh bhī kahnā thā duniyā-bhar ko sunā aa.e

nahr pe sāya-bār shajar ke jaal se maujeñ uljhī haiñ

koī 'hasan' us uljhā de koī jaa.e zarā suljhā aa.e

khiDki kholo kuchh to yahan bhi taza narm hawa aae

manzar sahn-e-chaman ka ubhre bu-e-dard-ruba aae

be-jaan fan mein jaan si aae zaKHm-e-tamanna taza ho

yaad mein rang hina ka lahke raqs mein baad-e-saba aae

mah-gazida raat hai sakit jaise koi aaina

os ke sabze par girne ki sannaTe mein sada aae

fazl-e-KHizan ke sukhe patte hanp rahe hain sae mein

saya apne tah-KHanon mein jae unhen pahuncha aae

pahron dil se baaten kar ke chain se baiThe hain aise

jaise jo kuchh bhi kahna tha duniya-bhar ko suna aae

nahr pe saya-bar shajar ke jal se maujen uljhi hain

koi 'hasan' us uljha de koi jae zara suljha aae