khiDki se zara jhank le ek bar mere yar

khiḌkī se zarā jhāñk le ik baar mere yaar

hai kaun tire dar pe talabgār mere yaar

ik giit sar-e-shām latā jī kī sharan meñ

aur us pe tire paañv kī jhankār mere yaar

hoñToñ se gavārā nahīñ āñkhoñ se lagā le

hai zehnī kashākash meñ terā yaar mere yaar

ik shaam zarā bhar kisī darvesh kī jholī

ye bhī haiñ tirī zulf ke haqdār mere yaar

mumkin nahīñ ban jā.ūñ kisī dar kā savālī

rahtā hai najaf meñ mirā sardār mere yaar

sab laash mirī qabr meñ rakhne pe tule haiñ

bas ek sadā thī ki mere yaar mere yaar

miltī na ho roTī jise do vaqt kī 'sājid'

vo kaise kare ishq pe guftār mire yaar

khiDki se zara jhank le ek bar mere yar

hai kaun tere dar pe talabgar mere yar

ek git sar-e-sham lata ji ki sharan mein

aur us pe tere panw ki jhankar mere yar

honTon se gawara nahin aankhon se laga le

hai zehni kashakash mein tera yar mere yar

ek sham zara bhar kisi darwesh ki jholi

ye bhi hain teri zulf ke haqdar mere yar

mumkin nahin ban jaun kisi dar ka sawali

rahta hai najaf mein mera sardar mere yar

sab lash meri qabr mein rakhne pe tule hain

bas ek sada thi ki mere yar mere yar

milti na ho roTi jise do waqt ki 'sajid'

wo kaise kare ishq pe guftar mere yar