khila hai phul bahut roz mein muqaddar ka

khilā hai phuul bahut roz meñ muqaddar kā

bas ab na band ho darvāza tere mandar kā

tamām shahr hai hañgāma-e-nashāt meñ gum

magar ye karb ye sannāTā mere andar kā

kabhī na khul ke hañsā huuñ na royā jī bhar ke

rakhā hai maiñ ne hamesha qadam barābar kā

sadā kisī kī ho aatā hai apne aap se ḳhauf

vo ajnabī huuñ ki ghar kā rahā na bāhar kā

gurez hai use merī galī se yuuñ jaise

yahāñ jo aayā to ho jā.egā vo patthar kā

ye gaahe gaahe kā milnā bhī koī milnā hai

jo ho sake to pata dījiye kabhī ghar kā

kabhī kabhī kā ho qissa to koī dukh bhī sune

uThā.e bojh bhalā kaun zindagī bhar kā

asīr-e-dām-e-fareb-e-zabāñ huā āḳhir

na e'tibār jise aayā dīda-e-tar kā

ġham-e-zamāna hai vo teġh-e-tishna-kām 'anjum'

uḌe haiñ paañv agar vaar bach gayā sar kā

khila hai phul bahut roz mein muqaddar ka

bas ab na band ho darwaza tere mandar ka

tamam shahr hai hangama-e-nashat mein gum

magar ye karb ye sannaTa mere andar ka

kabhi na khul ke hansa hun na roya ji bhar ke

rakha hai main ne hamesha qadam barabar ka

sada kisi ki ho aata hai apne aap se KHauf

wo ajnabi hun ki ghar ka raha na bahar ka

gurez hai use meri gali se yun jaise

yahan jo aaya to ho jaega wo patthar ka

ye gahe gahe ka milna bhi koi milna hai

jo ho sake to pata dijiye kabhi ghar ka

kabhi kabhi ka ho qissa to koi dukh bhi sune

uThae bojh bhala kaun zindagi bhar ka

asir-e-dam-e-fareb-e-zaban hua aaKHir

na e'tibar jise aaya dida-e-tar ka

gham-e-zamana hai wo tegh-e-tishna-kaam 'anjum'

uDe hain panw agar war bach gaya sar ka