khilta badan gulab ki jis ko nazar lage

khiltā badan gulāb kī jis ko nazar lage

ḳhushbū kī bhiiḌ meñ koī tujh sā magar lage

jab se diloñ ke biich meñ dīvār-o-dar lage

gulshan ke saare peḌ hameñ be-samar lage

kū-e-junūñ kī miT ga.ī pahchān sab magar

ḳhushbū jahāñ ruke vahīñ us kā hī ghar lage

kābul ho chiin ho ki vo bairūt kā dayār

maqtal meñ jo gire mujhe apnā hī sar lage

ham is makān se bhī bahut tang aa chuke

ghar aisā koī ho jo sadā apnā ghar lage

andar se reza reza hai vo shaḳhs bhī miyāñ

bāhar se dekhne meñ jo shorīda-sar lage

katba vahāñ lagā.iyo 'māhir' ke naam kā

dillī meñ jab numā.ish-e-ahl-e-hunar lage

khilta badan gulab ki jis ko nazar lage

KHushbu ki bhiD mein koi tujh sa magar lage

jab se dilon ke bich mein diwar-o-dar lage

gulshan ke sare peD hamein be-samar lage

ku-e-junun ki miT gai pahchan sab magar

KHushbu jahan ruke wahin us ka hi ghar lage

kabul ho chin ho ki wo bairut ka dayar

maqtal mein jo gire mujhe apna hi sar lage

hum is makan se bhi bahut tang aa chuke

ghar aisa koi ho jo sada apna ghar lage

andar se reza reza hai wo shaKHs bhi miyan

bahar se dekhne mein jo shorida-sar lage

katba wahan lagaiyo 'mahir' ke nam ka

dilli mein jab numaish-e-ahl-e-hunar lage