کھلتا بدن گلاب کی جس کو نظر لگے

کھلتا بدن گلاب کی جس کو نظر لگے

خوشبو کی بھیڑ میں کوئی تجھ سا مگر لگے

جب سے دلوں کے بیچ میں دیوار و در لگے

گلشن کے سارے پیڑ ہمیں بے ثمر لگے

کوئے جنوں کی مٹ گئی پہچان سب مگر

خوشبو جہاں رکے وہیں اس کا ہی گھر لگے

کابل ہو چین ہو کہ وہ بیروت کا دیار

مقتل میں جو گرے مجھے اپنا ہی سر لگے

ہم اس مکان سے بھی بہت تنگ آ چکے

گھر ایسا کوئی ہو جو سدا اپنا گھر لگے

اندر سے ریزہ ریزہ ہے وہ شخص بھی میاں

باہر سے دیکھنے میں جو شوریدہ سر لگے

کتبہ وہاں لگائیو ماہرؔ کے نام کا

دلی میں جب نمائش اہل ہنر لگے