KHirad ki shamon ke aasre par hayat ki shab basar na hogi

ḳhirad kī sham'oñ ke aasre par hayāt kī shab basar na hogī

abhī to raushan hai raat lekin ye raushnī tā-sahar na hogī

na ḳhaar hoñge jahāñ na patthar vo 'ishq kī rah-guzar na hogī

junūñ ko taskīñ na de sakegī vo raah jo pur-ḳhatar na hogī

sajā.ī thī ham ne bazm saaqī ki daur-e-jām-e-sharāb hogā

ye kyā ḳhabar thī ki mai-kade meñ hamīñ pe terī nazar na hogī

payām-e-bīmār-e-ġham hai qāsid Thahar Thahar ke bayān karnā

vo haal pūchheñ to bas ye kahnā zarūrat-e-chāra-gar na hogī

na kahne vaale kabhī thake haiñ na sunñe vāloñ ko niiñd aa.ī

ye ‘ishq-o-ulfat kī dāstāñ hai ye dāstāñ muḳhtasar na hogī

bajā sahī aap kā ye tā'na du'ā meñ tāsīr kyoñ nahīñ hai

ye sochiye aap kyā kareñge du'ā agar be-asar na hogī

mirā nasheman bhī jal chukā hai ujaḌ chukī shāḳh-e-āshiyāñ bhī

'aqīl' ab jānib-e-gulistāñ nigāh-e-barq-o-sharar na hogī

KHirad ki sham'on ke aasre par hayat ki shab basar na hogi

abhi to raushan hai raat lekin ye raushni ta-sahar na hogi

na KHar honge jahan na patthar wo 'ishq ki rah-guzar na hogi

junun ko taskin na de sakegi wo rah jo pur-KHatar na hogi

sajai thi hum ne bazm saqi ki daur-e-jam-e-sharab hoga

ye kya KHabar thi ki mai-kade mein hamin pe teri nazar na hogi

payam-e-bimar-e-gham hai qasid Thahar Thahar ke bayan karna

wo haal puchhen to bas ye kahna zarurat-e-chaara-gar na hogi

na kahne wale kabhi thake hain na sunne walon ko nind aai

ye ‘ishq-o-ulfat ki dastan hai ye dastan muKHtasar na hogi

baja sahi aap ka ye ta'na du'a mein tasir kyon nahin hai

ye sochiye aap kya karenge du'a agar be-asar na hogi

mera nasheman bhi jal chuka hai ujaD chuki shaKH-e-ashiyan bhi

'aqil' ab jaanib-e-gulistan nigah-e-barq-o-sharar na hogi