KHizan-dida gulistan ka nazara kar liya maine

ḳhizāñ-dīda gulistāñ kā nazārā kar liyā maiñ ne

na pā kar phuul kāñToñ hī se dāman bhar liyā maiñ ne

mujhī se uTh na paayā baar tablīġh-e-mohabbat kā

shar-o-fitna kā har ilzām apne sar liyā maiñ ne

darūn-e-mai-kada dekhī ġhalat-baḳhshī jo saaqī kī

to apne āñsuoñ se apnā sāġhar bhar liyā maiñ ne

ḳhulūs-e-dil se ab tanqīd karnā farz Thahrā hai

qalam kab hai qalam ab haath meñ nashtar liyā maiñ ne

mujhe kyā ḳhauf hastī kī kisī bhī zahr-nākī kā

ki zahr-e-hijr-e-jānāñ tak gavārā kar liyā maiñ ne

mire fan ne jilā paa.ī hai har tanqīd jaa.ez hai

har ik tanqīd-e-jā.ez ko sar āñkhoñ par liyā maiñ ne

ḳhudā ke fazl se maiñ mutma.in huuñ aur shākir bhī

baḌī himmat se har maidān ko sar kar liyā maiñ ne

mujhe 'maġhmūm' ab ho muḳhlisī is marne jiine se

bahut kuchh jī liyā maiñ ne bahut kuchh mar liyā maiñ ne

KHizan-dida gulistan ka nazara kar liya main ne

na pa kar phul kanTon hi se daman bhar liya main ne

mujhi se uTh na paya bar tabligh-e-mohabbat ka

shar-o-fitna ka har ilzam apne sar liya main ne

darun-e-mai-kada dekhi ghalat-baKHshi jo saqi ki

to apne aansuon se apna saghar bhar liya main ne

KHulus-e-dil se ab tanqid karna farz Thahra hai

qalam kab hai qalam ab hath mein nashtar liya main ne

mujhe kya KHauf hasti ki kisi bhi zahr-naki ka

ki zahr-e-hijr-e-jaanan tak gawara kar liya main ne

mere fan ne jila pai hai har tanqid jaez hai

har ek tanqid-e-jaez ko sar aankhon par liya main ne

KHuda ke fazl se main mutmain hun aur shakir bhi

baDi himmat se har maidan ko sar kar liya main ne

mujhe 'maghmum' ab ho muKHlisi is marne jine se

bahut kuchh ji liya main ne bahut kuchh mar liya main ne