kho gae yun kar-KHane ya kisi daftar mein hum

kho ga.e yuuñ kār-ḳhāne yā kisī daftar meñ ham

chhuTTiyoñ meñ ajnabī lagte haiñ apne ghar meñ ham

fāsle se dekhne vaalā hameñ samjhegā kyā

pyaas kā sahrā haiñ dariyāoñ ke pas-manzar meñ ham

raat ko sone se pahle kyā kareñ us kā hisāb

kitne sāyoñ kā ta.āqub kar sake din-bhar meñ ham

bas hamīñ ham haiñ jahāñ tak kaam kartī hai nigāh

ek zarra haiñ magar phaile haiñ bahr-o-bar meñ ham

muḳhtalif ḳhākoñ meñ chhīñToñ kī tarah taqsīm haiñ

kyā ubhar kar sāmne aa.eñ kisī manzar meñ ham

dūsrī jānib añdherā hai to kis ummīd par

jāgtī āñkhoñ ko rakh aa.e shigāf-e-dar meñ ham

hai ye majbūrī ki aañch aatī hai chāroñ samt se

varna sochā thā jiyeñge mom ke paikar meñ ham

haath jis shai kī taraf lapke vo ġhā.eb ho ga.ī

phañs ga.e 'māhir' ye kis aaseb ke chakkar meñ ham

kho gae yun kar-KHane ya kisi daftar mein hum

chhuTTiyon mein ajnabi lagte hain apne ghar mein hum

fasle se dekhne wala hamein samjhega kya

pyas ka sahra hain dariyaon ke pas-manzar mein hum

raat ko sone se pahle kya karen us ka hisab

kitne sayon ka taaqub kar sake din-bhar mein hum

bas hamin hum hain jahan tak kaam karti hai nigah

ek zarra hain magar phaile hain bahr-o-bar mein hum

muKHtalif KHakon mein chhinTon ki tarah taqsim hain

kya ubhar kar samne aaen kisi manzar mein hum

dusri jaanib andhera hai to kis ummid par

jagti aankhon ko rakh aae shigaf-e-dar mein hum

hai ye majburi ki aanch aati hai chaaron samt se

warna socha tha jiyenge mom ke paikar mein hum

hath jis shai ki taraf lapke wo ghaeb ho gai

phans gae 'mahir' ye kis aaseb ke chakkar mein hum