خود اپنی دھند سے ہوتا نکل بھی سکتا ہوں

خود اپنی دھند سے ہوتا نکل بھی سکتا ہوں

میں آج تک نہیں نکلا نکل بھی سکتا ہوں

ترے افق پہ نکل کر غروب ہوتے ہوئے

کسی طرف سے دوبارہ نکل بھی سکتا ہوں

بہت امید نہیں ہے مری نمو کی مگر

کہیں کہیں سے ذرا سا نکل بھی سکتا ہوں

نہ کر غرور بہت صید افگنی پہ کہ میں

تمھارے دام میں آتا نکل بھی سکتا ہوں

میں چاہتا ہوں کہ اب کوئی میرے ساتھ چلے

اک ایسی رہ پہ کہ تنہا نکل بھی سکتا ہوں

میں اس طرح کا نہیں پھر بھی آدمی ہی تو ہوں

حضر کرو کہ میں ایسا نکل بھی سکتا ہوں

ڈٹا ہوا ہوں محبت میں آفتاب حسینؔ

اگرچہ جان بچاتا نکل بھی سکتا ہوں