KHud haal aa ke dekh lo KHana-KHarab ka

ḳhud haal aa ke dekh lo ḳhāna-ḳharāb kā

ab tak ye muntazir hai tumhāre javāb kā

tā'rīf kyā karūñ abhī tanqīd kyā karūñ

kuchh baab hī paḌhā hai tumhārī kitāb kā

ai sard-qaum tujh meñ harārat kī thī kamī

ehsān hai ye tujh pe mire inqalāb kā

yādoñ kī titliyoñ ko ta'ajjub huā bahut

qissa sunā gayā vo adhūre gulāb kā

tum kyā ga.e ki duniyā hī merī ujaḌ ga.ī

pūchho na mujh se haal mire iztirāb kā

sūraj se aaj phir huī shāyad kahā-sunī

utrā huā sā muñh hai mire māhtāb kā

sharmindagī to hogī ai 'saifī' bahut mujhe

aa jā.egā jo vaqt hisāb-o-kitāb kā

KHud haal aa ke dekh lo KHana-KHarab ka

ab tak ye muntazir hai tumhaare jawab ka

ta'rif kya karun abhi tanqid kya karun

kuchh bab hi paDha hai tumhaari kitab ka

ai sard-qaum tujh mein hararat ki thi kami

ehsan hai ye tujh pe mere inqalab ka

yaadon ki titliyon ko ta'ajjub hua bahut

qissa suna gaya wo adhure gulab ka

tum kya gae ki duniya hi meri ujaD gai

puchho na mujh se haal mere iztirab ka

suraj se aaj phir hui shayad kaha-suni

utra hua sa munh hai mere mahtab ka

sharmindagi to hogi ai 'saifi' bahut mujhe

aa jaega jo waqt hisab-o-kitab ka