KHud hi ke hisse ki KHushi pane se rah gae

ḳhud hī ke hisse kī ḳhushī paane se rah ga.e

apne hī saath vaqt bitāne se rah ga.e

vo sab bane jo aap banāte ga.e hameñ

ham yaar ḳhud ko kuchh bhī banāne se rah ga.e

ye duniyā ham se ruuTh ga.ī aap ke sabab

aur is pe aap ko bhī manāne se rah ga.e

us ne ishāra hī nahīñ samjhā kabhī mirā

har baar mere tiir nishāne se rah ga.e

ik roz us ne ham ko divānā sā kah diyā

phir us ke baa'd ham bhī divāne se rah ga.e

KHud hi ke hisse ki KHushi pane se rah gae

apne hi sath waqt bitane se rah gae

wo sab bane jo aap banate gae hamein

hum yar KHud ko kuchh bhi banane se rah gae

ye duniya hum se ruTh gai aap ke sabab

aur is pe aap ko bhi manane se rah gae

us ne ishaara hi nahin samjha kabhi mera

har bar mere tir nishane se rah gae

ek roz us ne hum ko diwana sa kah diya

phir us ke ba'd hum bhi diwane se rah gae