KHud hi mil baiThe ho ye kaisi shanasai hui

ḳhud hī mil baiThe ho ye kaisī shanāsā.ī huī

dasht meñ pahuñche na ghar chhoḌā na rusvā.ī huī

saañs tak lene nahīñ detā thā āvāzoñ kā shor

jab parinde uḌ ga.e sunsān tanhā.ī huī

le chalā ham ko bulandī kī taraf dariyā kā ḳhauf

kyā kareñge ham pahāḌoñ par agar kaa.ī huī

apnī gahrā.ī kī jānib jhuk rahā hai āsmāñ

DhūñDne niklī hai ḳhud ko aañkh ghabrā.ī huī

raat bhar duniyā rahī hai tīrgī ke sehr meñ

sub.h kī pahlī kiran āñkhoñ meñ bīnā.ī huī

phir ghirā huuñ halqa-e-yārāñ meñ mujrim kī tarah

phir kahī hai dāstāñ sau baar dohrā.ī huī

haath phailā.ūñ to kis kī samt apnā ruḳh karūñ

āsmāñ dushman zamīñ bandoñ se uktā.ī huī

log galiyoñ meñ nikal aa.e haiñ bachchoñ kī tarah

sar pe jab TuuTe sitāre bazm-ārā.ī huī

saa.e kī rañgat fazā kī raushnī meñ ghul ga.ī

ab ke chehroñ par paḌī hai dhuup kajlā.ī huī

āḳhir-e-kār apnī āñkheñ phoḌ liiñ tasvīr ne

saarī duniyā jab un āñkhoñ kī tamannā.ī huī

aañkh se haTte nahīñ guzrī huī duniyā ke rañg

ham ne in lamhoñ ko hai zanjīr pahnā.ī huī

KHud hi mil baiThe ho ye kaisi shanasai hui

dasht mein pahunche na ghar chhoDa na ruswai hui

sans tak lene nahin deta tha aawazon ka shor

jab parinde uD gae sunsan tanhai hui

le chala hum ko bulandi ki taraf dariya ka KHauf

kya karenge hum pahaDon par agar kai hui

apni gahrai ki jaanib jhuk raha hai aasman

DhunDne nikli hai KHud ko aankh ghabrai hui

raat bhar duniya rahi hai tirgi ke sehr mein

subh ki pahli kiran aankhon mein binai hui

phir ghira hun halqa-e-yaran mein mujrim ki tarah

phir kahi hai dastan sau bar dohrai hui

hath phailaun to kis ki samt apna ruKH karun

aasman dushman zamin bandon se uktai hui

log galiyon mein nikal aae hain bachchon ki tarah

sar pe jab TuTe sitare bazm-arai hui

sae ki rangat faza ki raushni mein ghul gai

ab ke chehron par paDi hai dhup kajlai hui

aaKHir-e-kar apni aankhen phoD lin taswir ne

sari duniya jab un aankhon ki tamannai hui

aankh se haTte nahin guzri hui duniya ke rang

hum ne in lamhon ko hai zanjir pahnai hui