KHud ko deta hun tasalli yahi ghabrane par

ḳhud ko detā huuñ tasallī yahī ghabrāne par

vo zarūr aa.egā dariyā ke utar jaane par

zā.iqa is kā to chakhnā hī paḌegā sab ko

naam sab kā hai likhā maut ke paimāne par

lag rahā hai ki maiñ zinda huuñ abhī tak varna

daf'atan dil na dhaḌaktā yuuñ tire aane par

apne hāthoñ meñ uThā rakkhe haiñ sab ne patthar

kaun likkhegā qasīda yahāñ dīvāne par

husn parvā kahāñ kartā hai koī jaañ se gayā

sham' kab rotī hai parvāne ke jal jaane par

haa.e re vaqt ne kyā mujh pe sitam Dhāyā hai

log hañste haiñ mire 'ishq ke afsāne par

apne is bande ko īmān se ḳhālī na samajh

naqsh hai naam tirā dil ke har ik ḳhāne par

tum vahāñ bāñTne aa.e ho mohabbat 'rānā'

log hañste haiñ jahāñ phuul bikhar jaane par

KHud ko deta hun tasalli yahi ghabrane par

wo zarur aaega dariya ke utar jaane par

zaiqa is ka to chakhna hi paDega sab ko

nam sab ka hai likha maut ke paimane par

lag raha hai ki main zinda hun abhi tak warna

daf'atan dil na dhaDakta yun tere aane par

apne hathon mein uTha rakkhe hain sab ne patthar

kaun likkhega qasida yahan diwane par

husn parwa kahan karta hai koi jaan se gaya

sham' kab roti hai parwane ke jal jaane par

hae re waqt ne kya mujh pe sitam Dhaya hai

log hanste hain mere 'ishq ke afsane par

apne is bande ko iman se KHali na samajh

naqsh hai nam tera dil ke har ek KHane par

tum wahan banTne aae ho mohabbat 'rana'

log hanste hain jahan phul bikhar jaane par