KHud mohabbat dard hai aur dard ka darman bhi hai

ḳhud mohabbat dard hai aur dard kā darmāñ bhī hai

hai ye vo mushkil ki mushkil bhī hai aur āsāñ bhī hai

āshiq-e-abru-e-jānāñ āshiq-e-mizhgāñ bhī hai

dil meñ shauq-e-teġh hai zauq-e-lab-e-paikāñ bhī hai

mere ghar ā.eñge vo laayā hai muzhda nāma-bar

ye payām-e-zīst bhī hai maut kā sāmāñ bhī hai

sach batā parvāne kis kī ātish-e-ulfat hai tez

kaun sozinda bhī hai aur kaun ḳhud sozāñ bhī hai

ibtidā mauhūm us kī intihā mādūm hai

ye kitāb-e-umr kā mazmūñ bhī hai unvāñ bhī hai

kyā batā.eñ tum ko ham narḳh-e-matā.a-e-zindagī

ye kabhī behad girāñ hai aur kabhī arzāñ bhī hai

ḳhūgar-e-jaur-e-musalsal ho ga.e qalb-o-jigar

mujh par un kā bhī karam hai ġhair kā ehsāñ bhī hai

chashm-e-jānāñ jān-levā bhī hai aur jāñ-baḳhsh bhī

maut kā baa.is bhī hai aur chashma-e-haivāñ bhī hai

qatra-e-ḳhūñ jo tarāz-e-nok-e-mizhgāñ thā kabhī

ab vahī rangīn-gauhar zīnat-e-dāmāñ bhī hai

rutba-e-ālī hamāre dāġh-e-dil kā dekhiye

rū-kash-e-ḳhurshīd bhī rashk-e-mah-e-tābāñ bhī hai

khīñchtā hai kyoñ mire pahlū se tīr-e-dil-navāz

dil ke bahlāne kā hamdam aur kuchh sāmāñ bhī hai

ye kashish kis kī hai kis kā lutf hai kis kā karam

aaj mahfil meñ kisī kī 'bedil'-e-ḳhush-ḳhvāñ bhī hai

KHud mohabbat dard hai aur dard ka darman bhi hai

hai ye wo mushkil ki mushkil bhi hai aur aasan bhi hai

aashiq-e-abru-e-jaanan aashiq-e-mizhgan bhi hai

dil mein shauq-e-tegh hai zauq-e-lab-e-paikan bhi hai

mere ghar aaenge wo laya hai muzhda nama-bar

ye payam-e-zist bhi hai maut ka saman bhi hai

sach bata parwane kis ki aatish-e-ulfat hai tez

kaun sozinda bhi hai aur kaun KHud sozan bhi hai

ibtida mauhum us ki intiha madum hai

ye kitab-e-umr ka mazmun bhi hai unwan bhi hai

kya bataen tum ko hum narKH-e-mataa-e-zindagi

ye kabhi behad giran hai aur kabhi arzan bhi hai

KHugar-e-jaur-e-musalsal ho gae qalb-o-jigar

mujh par un ka bhi karam hai ghair ka ehsan bhi hai

chashm-e-jaanan jaan-lewa bhi hai aur jaan-baKHsh bhi

maut ka bais bhi hai aur chashma-e-haiwan bhi hai

qatra-e-KHun jo taraaz-e-nok-e-mizhgan tha kabhi

ab wahi rangin-gauhar zinat-e-daman bhi hai

rutba-e-ali hamare dagh-e-dil ka dekhiye

ru-kash-e-KHurshid bhi rashk-e-mah-e-taban bhi hai

khinchta hai kyon mere pahlu se tir-e-dil-nawaz

dil ke bahlane ka hamdam aur kuchh saman bhi hai

ye kashish kis ki hai kis ka lutf hai kis ka karam

aaj mahfil mein kisi ki 'bedil'-e-KHush-KHwan bhi hai