ḳhud savāl aap hī javāb huuñ maiñ
zindagī kī khulī kitāb huuñ maiñ
yuuñ to ik jur.a-e-sharāb huuñ maiñ
gardish-e-vaqt kā javāb huuñ maiñ
justajū-e-sukūn-e-dil thī mujhe
ġharq-e-dariyā-e-iztirāb huuñ maiñ
merī qīmat hai pyaar ke do-bol
kitne saste meñ dastiyāb huuñ maiñ
kabhī naġhma-tarāz thā maiñ bhī
aaj TuuTā huā rabāb huuñ maiñ
rañj ġham dard be-kasī hasrat
'mīr' kā jaise intiḳhāb huuñ maiñ
kaun mujh par yaqīn lā.egā
apnī nazroñ meñ ḳhud sarāb huuñ maiñ
pahle sailāb se pareshāñ thā
ab ki mahv-e-talāsh-e-āb huuñ maiñ
muḳhtalif rañg haiñ mire 'ābid'
kabhī jalva kabhī hijāb huuñ maiñ
KHud sawal aap hi jawab hun main
zindagi ki khuli kitab hun main
yun to ek jura-e-sharab hun main
gardish-e-waqt ka jawab hun main
justaju-e-sukun-e-dil thi mujhe
gharq-e-dariya-e-iztirab hun main
meri qimat hai pyar ke do-bol
kitne saste mein dastiyab hun main
kabhi naghma-taraaz tha main bhi
aaj TuTa hua rabab hun main
ranj gham dard be-kasi hasrat
'mir' ka jaise intiKHab hun main
kaun mujh par yaqin laega
apni nazron mein KHud sarab hun main
pahle sailab se pareshan tha
ab ki mahw-e-talash-e-ab hun main
muKHtalif rang hain mere 'abid'
kabhi jalwa kabhi hijab hun main
Source:
Intikhab Apna Apna (Pg. 88)
-
- Edition: 1987
- Publisher: Seemant Parkashan, New Delhi
- Year of Publication: 1987
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.