KHud se juda hue to kahin ke nahin rahe

ḳhud se judā hue to kahīñ ke nahīñ rahe

yuuñ dar-ba-dar hue ki zamīñ ke nahīñ rahe

rishte rafāqatoñ ke raqābat meñ Dhal ga.e

dīvār-o-dar bhī apne makīñ ke nahīñ rahe

ye kūza-gar ye chaak ye miTTī ye aag sab

zo’m-e-hunar meñ dekh kahīñ ke nahīñ rahe

hijrat-zada libās meñ phirte haiñ dar-ba-dar

rahnā thā jis nagar meñ vahīñ ke nahīñ rahe

dahshat ko bāñTte rahe le kar ḳhudā kā naam

ḳhud-sāḳhta jihād meñ diiñ ke nahīñ rahe

aisī chalī hai bād-e-muḳhālif ki duur tak

naqsh-e-qadam bhī ḳhāk-nashīñ ke nahīñ rahe

ḳhvāboñ ke zaḳhm aañkh se risne lage 'ġhazal'

ye dard-e-jāñ bhī qalb-e-hazīñ ke nahīñ rahe

KHud se juda hue to kahin ke nahin rahe

yun dar-ba-dar hue ki zamin ke nahin rahe

rishte rafaqaton ke raqabat mein Dhal gae

diwar-o-dar bhi apne makin ke nahin rahe

ye kuza-gar ye chaak ye miTTi ye aag sab

zo’m-e-hunar mein dekh kahin ke nahin rahe

hijrat-zada libas mein phirte hain dar-ba-dar

rahna tha jis nagar mein wahin ke nahin rahe

dahshat ko banTte rahe le kar KHuda ka nam

KHud-saKHta jihad mein din ke nahin rahe

aisi chali hai baad-e-muKHalif ki dur tak

naqsh-e-qadam bhi KHak-nashin ke nahin rahe

KHwabon ke zaKHm aankh se risne lage 'ghazal'

ye dard-e-jaan bhi qalb-e-hazin ke nahin rahe