KHuda hi aap na jab tak zamin pe utrega

ḳhudā hī aap na jab tak zamīñ pe utregā

to kaun puurā kisī ke yaqīñ pe utregā

ye sail-e-ashk bhī apnā hai aañkh bhī apnī

khaḌe raho ki ye dariyā yahīñ pe utregā

bharosa koī nahīñ hai kisī musāfir kā

jahāñ bhī rail rukegī vahīñ pe utregā

chale to ho safar-e-‘ishq par ḳhayāl rahe

kahīñ chaḌhegā ye dariyā kahīñ pe utregā

tamām ḳhāk-nashīñ zer-e-ḳhāk hoñge magar

lahū kā rang tirī āstīñ pe utregā

yahāñ bhare hue baiThe haiñ sab bañdhe hāthoñ

so ab ye ġhussa tire jā-nashīñ pe utregā

'jamāl' ḳhitta-e-dil ho bhī jaa.e gar hamvār

koī jahāz na is sarzamīñ pe utregā

KHuda hi aap na jab tak zamin pe utrega

to kaun pura kisi ke yaqin pe utrega

ye sail-e-ashk bhi apna hai aankh bhi apni

khaDe raho ki ye dariya yahin pe utrega

bharosa koi nahin hai kisi musafir ka

jahan bhi rail rukegi wahin pe utrega

chale to ho safar-e-‘ishq par KHayal rahe

kahin chaDhega ye dariya kahin pe utrega

tamam KHak-nashin zer-e-KHak honge magar

lahu ka rang teri aastin pe utrega

yahan bhare hue baiThe hain sab bandhe hathon

so ab ye ghussa tere ja-nashin pe utrega

'jamal' KHitta-e-dil ho bhi jae gar hamwar

koi jahaz na is sarzamin pe utrega