KHuda kare ki na ho zindagi ki sham abhi

ḳhudā kare ki na ho zindagī kī shaam abhī

ki dāstān-e-ġham-e-dil hai nā-tamām abhī

nigāh-e-nāz se saaqī ik aur jaam abhī

ġham-e-hayāt se lenā hai intiqām abhī

abhī mujhe na satāo sahar ke afsāne

dil-o-nigāh pe chhā.ī huī hai shaam abhī

jahāñ se ahl-e-ḳhirad nā-murād lauT aa.e

junūñ kī raah meñ ā.eñge vo maqām abhī

abhī hayāt meñ rangīni-e-hayāt kahāñ

kisī kā lutf-o-karam hai barā.e naam abhī

ye jhilmilāte sitāre mujhe fareb na deñ

mirā sharīk-e-safar hai charāġh-e-shām abhī

abhī 'aqīl' yaqīn-e-sukūn-e-dil kyoñ ho

hazār rang badalte haiñ sub.h-o-shām abhī

KHuda kare ki na ho zindagi ki sham abhi

ki dastan-e-gham-e-dil hai na-tamam abhi

nigah-e-naz se saqi ek aur jam abhi

gham-e-hayat se lena hai intiqam abhi

abhi mujhe na satao sahar ke afsane

dil-o-nigah pe chhai hui hai sham abhi

jahan se ahl-e-KHirad na-murad lauT aae

junun ki rah mein aaenge wo maqam abhi

abhi hayat mein rangini-e-hayat kahan

kisi ka lutf-o-karam hai barae nam abhi

ye jhilmilate sitare mujhe fareb na den

mera sharik-e-safar hai charagh-e-sham abhi

abhi 'aqil' yaqin-e-sukun-e-dil kyon ho

hazar rang badalte hain subh-o-sham abhi