خدا کرے کہ نہ ہو زندگی کی شام ابھی

خدا کرے کہ نہ ہو زندگی کی شام ابھی

کہ داستان غم دل ہے ناتمام ابھی

نگاہ ناز سے ساقی اک اور جام ابھی

غم حیات سے لینا ہے انتقام ابھی

ابھی مجھے نہ ستاؤ سحر کے افسانے

دل و نگاہ پہ چھائی ہوئی ہے شام ابھی

جہاں سے اہل خرد نامراد لوٹ آئے

جنوں کی راہ میں آئیں گے وہ مقام ابھی

ابھی حیات میں رنگینئ حیات کہاں

کسی کا لطف و کرم ہے برائے نام ابھی

یہ جھلملاتے ستارے مجھے فریب نہ دیں

مرا شریک سفر ہے چراغ شام ابھی

ابھی عقیلؔ یقین سکون دل کیوں ہو

ہزار رنگ بدلتے ہیں صبح و شام ابھی