KHuda ke waste kuchh din ho mehrban sayyaad

ḳhudā ke vāste kuchh din ho mehrbāñ sayyād

na kar bahār meñ mujh ko ravāñ-davāñ sayyād

baḌhī hai had se sivā garmī-e-fuġhāñ sayyād

ki ab to ḳhushk huī jaatī hai zabāñ sayyād

guzishta haal mujhe apnā yaad karne de

sunā.ūñgā tujhe phir apnī dāstāñ sayyād

qafas meñ dekh ke afsurda mehrbānī kī

sunā rahā hai mujhe apnī dāstāñ sayyād

ġharaz ye hai ki rahūñ hashr tak asiir tirā

mare pe kāTnā merī na beḌiyāñ sayyād

asiir kahte haiñ sab merī bad-zabānī se

ajab nahīñ ki abhī kaaT le zabāñ sayyād

paroñ ko khol ke us ko duā.eñ detā hai

jo kuchh asiir pe hotā hai meherbāñ sayyād

zamāna qaid meñ guzrā to kī hai dil-jūī

ki rafta rafta huā hai mizāj-dāñ sayyād

asiir tū ne kiyā hai tujhī se kahnā hai

burā bhalā mujhe kahnā hai bāġhbāñ sayyād

kiyā hai qaid magar ye batā ḳhudā ke liye

chaman se le ke mujhe jā.egā kahāñ sayyād

qafas ke paas agar aa ke baiTh dam bhar ko

maze kī tujh ko sunā.ūñgā dāstāñ sayyād

chaman se dasht meñ jaanā hai bulbuloñ kā muhāl

sunā hai raah meñ lūTegā kārvāñ sayyād

use shajar ko girāyā hai baaġh meñ tū ne

ki jis kī shāḳh pe thā merā āshiyāñ sayyād

na āshiyāñ hai na maiñ huuñ na hai qafas baaqī

samajh samajh ke miTāyā mirā nishāñ sayyād

yaqīn hai ki kisī roz dil ko thāmegā

sunī asīroñ kī chhup-chhup ke dāstāñ sayyād

jo ab zabāñ se karūñ jal ke ḳhaak ho jaa.eñ

barā.e naam qafas kī haiñ tīliyāñ sayyād

kare asīroñ pe jo zulm tujh ko zebā hai

zamīn terī hai terā hai āsmāñ sayyād

huī hai qaid meñ muddat ki kuchh bhī yaad nahīñ

ki thī bahār gulistāñ meñ yā ḳhizāñ sayyād

asar to dekh maiñ zikr-e-bahār kartā huuñ

ki sabz hoñgī qafas kī bhī tīliyāñ sayyād

'shafīq' zabt kiyā aisā āh-e-sozāñ ko

jigar se ab mire uThne lagā dhuāñ sayyād

KHuda ke waste kuchh din ho mehrban sayyaad

na kar bahaar mein mujh ko rawan-dawan sayyaad

baDhi hai had se siwa garmi-e-fughan sayyaad

ki ab to KHushk hui jati hai zaban sayyaad

guzishta haal mujhe apna yaad karne de

sunaunga tujhe phir apni dastan sayyaad

qafas mein dekh ke afsurda mehrbani ki

suna raha hai mujhe apni dastan sayyaad

gharaz ye hai ki rahun hashr tak asir tera

mare pe kaTna meri na beDiyan sayyaad

asir kahte hain sab meri bad-zabani se

ajab nahin ki abhi kaT le zaban sayyaad

paron ko khol ke us ko duaen deta hai

jo kuchh asir pe hota hai meherban sayyaad

zamana qaid mein guzra to ki hai dil-jui

ki rafta rafta hua hai mizaj-dan sayyaad

asir tu ne kiya hai tujhi se kahna hai

bura bhala mujhe kahna hai baghban sayyaad

kiya hai qaid magar ye bata KHuda ke liye

chaman se le ke mujhe jaega kahan sayyaad

qafas ke pas agar aa ke baiTh dam bhar ko

maze ki tujh ko sunaunga dastan sayyaad

chaman se dasht mein jaana hai bulbulon ka muhaal

suna hai rah mein luTega karwan sayyaad

use shajar ko giraya hai bagh mein tu ne

ki jis ki shaKH pe tha mera aashiyan sayyaad

na aashiyan hai na main hun na hai qafas baqi

samajh samajh ke miTaya mera nishan sayyaad

yaqin hai ki kisi roz dil ko thamega

suni asiron ki chhup-chhup ke dastan sayyaad

jo ab zaban se karun jal ke KHak ho jaen

barae nam qafas ki hain tiliyan sayyaad

kare asiron pe jo zulm tujh ko zeba hai

zamin teri hai tera hai aasman sayyaad

hui hai qaid mein muddat ki kuchh bhi yaad nahin

ki thi bahaar gulistan mein ya KHizan sayyaad

asar to dekh main zikr-e-bahaar karta hun

ki sabz hongi qafas ki bhi tiliyan sayyaad

'shafiq' zabt kiya aisa aah-e-sozan ko

jigar se ab mere uThne laga dhuan sayyaad