خلوص و پیار گر اہل چمن کے درمیاں ہوتا

خلوص و پیار گر اہل چمن کے درمیاں ہوتا

چمن میں رہنا ہم کو کس لئے بار گراں ہوتا

چھپا رکھا اجل کی آنکھ سے اس ناتوانی نے

وگرنہ پیکر خاکی یہ جنت آشیاں ہوتا

فضیلت اس کو ثابت کرنی تھی انسان کی ورنہ

رسول آتے نہ دنیا میں نہ صحرا گلستاں ہوتا

لٹا کر دولت ہوش و خرد یہ مدعا پایا

ہمیں اے کاش کچھ اندازۂ سود و زیاں ہوتا

بساط آشیاں اے برق کیا دو چار تنکے تھے

مزہ تو جب تھا تیری زد میں سارا گلستاں ہوتا

عدالت میں ضرورت ہی نہ تھی جھوٹی گواہی کو

اگر جو خنجر قاتل حقیقت کی زباں ہوتا

نہ کرتے نفرتوں کی تخم ریزی ہم اگر فیضیؔ

تو یہ ہندوستاں اپنا وہی جنت نشاں ہوتا