خلوص و پیار سے کشکول دل کا بھرنا بھی

خلوص و پیار سے کشکول دل کا بھرنا بھی

کسی کے غم میں عبادت ہے آہ کرنا بھی

کلی کی آنکھ بھر آئی یہ سوچ کر شاید

بس ایک رات میں کھلنا بھی ہے بکھرنا بھی

نہ جانے کس لیے ہم لوگ بھول بیٹھے ہیں

کہ پل صراط سے اک روز ہے گزرنا بھی

بس ایک لمحے سے ہوتا ہے اک صدی کا جنم

صدی کی موت ہے لمحے کا قتل کرنا بھی

سمٹنا دن کا ابھی تک ہے میری آنکھوں میں

غرور شب کا نگاہوں میں ہے بکھرنا بھی

وہ ہر مقام پہ بے خوف ہو کے بولے گا

وہ جانتا ہے ہر اک پل خدا سے ڈرنا بھی

جھلس کے رہ گئے جب سایہ دار پیڑ شعورؔ

تو کیا عجب ہے شگوفوں کا رنگ اترنا بھی