KHumar apni ana ka utar chuka kab ka

ḳhumār apnī anā kā utar chukā kab kā

tire havāle to maiñ ḳhud ko kar chukā kab kā

vo ek lamha ki jab tū hī to thā paas mire

vo ek lamha-e-vahdat guzar chukā kab kā

ye maiñ jo tujh ko nazar aa rahā huuñ maiñ huuñ kahāñ

maiñ ḳhaak ban ke havā meñ bikhar chukā kab kā

kaho ki phir se utāre vo qalb meñ nashtar

purānā zaḳhm mire dil kā bhar chukā kab kā

ye aur baat abhī saañs kī hai āmad-o-raft

maiñ apne jism ke andar to mar chukā kab kā

kahāñ haiñ 'yāvar'-e-āshufta-sar bulāo unheñ

nigār-ḳhāna-e-maqtal sañvar chukā kab kā

KHumar apni ana ka utar chuka kab ka

tere hawale to main KHud ko kar chuka kab ka

wo ek lamha ki jab tu hi to tha pas mere

wo ek lamha-e-wahdat guzar chuka kab ka

ye main jo tujh ko nazar aa raha hun main hun kahan

main KHak ban ke hawa mein bikhar chuka kab ka

kaho ki phir se utare wo qalb mein nashtar

purana zaKHm mere dil ka bhar chuka kab ka

ye aur baat abhi sans ki hai aamad-o-raft

main apne jism ke andar to mar chuka kab ka

kahan hain 'yawar'-e-ashufta-sar bulao unhen

nigar-KHana-e-maqtal sanwar chuka kab ka